Tíunda starfsár Kvennakórs Garðabæjar er hafið. Kóræfingar eru á mánudagskvöldum en raddæfingar á fimmtudögum. Haustönnin verður með ólíku sniði í ár vegna undirbúnings og upptöku fyrir jólahljómdisk sem kemur út í byrjun desember nk. Árlegir aðventutónleikar verða þá í senn útgáfutónleikar. Kóræfingar fara fram í Kórhöllinni (gamla Betrunarhúsinu) á Garðatorgi þar sem kórinn hefur hreiðrað um sig í einkar glæsilegu rými bæði fyrir æfingar og samveru.
Kórinn mun ekki auglýsa formlega eftir nýjum konum í kórinn fyrr en um áramót. Áhugasamar konur eru hvattar til að hafa samband við Ingibjörgu kórstjóra 864 2722 og skrá sig.

Kvennakór Garðabæjar tekur þátt í kóramótinu Nordic-Baltic sem verður haldið í Reykjavík dagana 17.-21.ágúst. Mikil tilhlökkun ríkir meðal kórkvenna því tækifærið er einstakt. Áhugamannakórar jafnt sem atvinnukórar mæta til leiks. Dagskrá mótsins samanstendur af kóræfingum og tónleikahaldi.  Einnig verður boðið upp á fjölda hádegis- og kvöldtónleika víða um borgina þar sem 3-4 kórar syngja sína eigin 15. mínútna efnisskrá. Þátttakendur koma frá 10 löndum og telur heildarfjöldi kórfólks um 1.800 manns.

Við viljum vekja sérstaka athygli á því að Kvennakór Garðabæjar syngur á kvöldtónleikum í Fríkirkjunni í Reykjavík föstudaginn 20. ágúst kl. 20 auk þriggja annarra erlendra kóra. Einnig syngur kórinn á Menningarnótt Rvk. á tveimur stöðum, kl. 14.30 á Bríetartorgi (horni Þingholtsstrætis og Amtmannsstígs) og kl. 16.00 á Austurvelli í Kvennafrítjaldinu. Síðan verða sannkallaðir stórtónleikar í Laugardagshöll um kvöldið þar sem allir kórarnir syngja saman og sýna afrakstur æfinga og samsöngs sl. daga. Við hvetum fólk til að kynna sér tónleikahald mótsins á heimasíðu kóramótsins www.choral.iii.is  
Glæsileg byrjun á tíunda starfsári kórsins

Já, eins og þið takið eflaust eftir hefur kórinn fengið nýtt útlit, þ.e.a.s. á veraldarvefnum vinsæla  
Kórinn leitaði til veffyrirtækisins Davíð & Golíat sem býður upp á skemmtilegar lausnir fyrir heimasíðugerð og hýsingu.  Nú mun fjölmiðlafulltrúi kórsins auk kórstjóra keppast við að hafa síðuna sem "ferskasta" bæði í tali og tónum.  NJÓTIÐ VEL. 

Kvennakór Garðabæjar æfir nú af fullum krafti fyrir afmælistónleika sína í Langholtskikju sunnudaginn 2. maí kl. 16 en kórinn fagnar tíu ára afmæli sínu á þessu starfsári. Efnisskrá tónleikanna verður  einka fjölbreytt. Kórverk, íslensk og erlend, frá fyrri starfsárum munu hljóma á tónleikunum enda mörg laganna í miklu uppáhaldi hjá kórkonum. Á tónleikunum spilar fimm manna strengjasveit auk Sólveigar Önnu Jónsdóttur, píanóleikara kórsins. Kórstjóri er Ingibjörg Guðjónsdóttir
Tónleikar Kvennakórs Garðabæjar hafa ætíð verið vel sóttir og á kórinn nú tryggan hóp áheyrenda. Eins og undanfarin ár er forsala aðgöngumiða hjá kórkonum en einnig er hægt að senda póst á kvennakor@kvennakor.is. Velunnurum er bent á að fylgjast með starfi kórsins á www.kvennakor.is